¿Sobradamente preparaos?

¡Que guapos aquellos díes nos que l’agora Presidente’l Gobiernu falaba de la “incapacidá” de los ministros de ZP! ¡Qué razón tenía cuando falaba de la “confianza” de diben xenerar los del PP!  Entós, yera perfácil atopase delantre la barra’l chigre con abondos paisanos que, al alto la lleva, defendíen que “la xente’l PP ta muncho más preparada”. Y quedábense a gustu. Ye lo bono de les “llendes urbanes” (esta sí que lo ye, y non aquella que llanzó Areces): nun hai más qu'oyílo en dalgún mediu pa que milenta voces lo den por ciertu.

Ta nidio que, como too na vida, una cosa ye predicar y otra ye dar escanda. De sópitu, la enantes tan criticada “descoordinación” va y lluz cegadora ente les files del Gobiernu de Rajoy: un día Montoro diz daqué, al otru De Guindos diz otra cosa... Mato diz esto, y Saenz de Santamaría diz lo otro... ¿Tan coordinaos o ye que'l gran “coordinador” ta fumando un puru? Nun se vió, tovía, una crítica llaceriante de dalgún Direutor Xeneral que pon nel “currículum” por toa formación “funcionariu del Estáu” (como si eso  fuera un títulu universitariu) y un par de cursillinos (uno fechu, sospechosamente, l'añu pasáu, como p'abellugase nel) y por toa esperiencia llaboral “conceyal dende...”  Esi home ya perpreparáu. De xuru. De les “pillaes” del novatu Presi ya falamos n’otru post, pero ye qu'otra vegada tornó a descuidase (esti home nun aprendi) y van...

 Pero si dalgún ministru tien derechu a un premiu, esti ye'l d’Educación, un tal Wert. L’otru día, dixo que diba camudar l'asignatura “Educación pala ciudadanía” por otra “abondo menos “sectaria” y “adoctrinante”. Ye interesante cayer na cuenta de qu'esi argumentu que se nos da munches vegaes a los asturfalantes de que “hai a esgaya de coses de les qu'esmolecese enantes de facer l’asturianu oficial”, nun ye d’aplicación cuando hai que desfacer delles coses que nun tan d’alcuerdu cola Ilesia Católica: ya entamaron cola asignatura, cola llei del abortu y cola “píldora del día después”.  EL casu ye qu'al tal Wert entrugáron-y pol supuestu conteníu “adoctrinante” de l'asignatura d’Educación pala ciudadanía y dexo cayer un par d'argumentos. El fechu de que seyan los mesmos que ya dieron en tolos medios “ultracentristas” nun tien por qué ser estrañu, si nun fuera que fai a esgaya tiempu que ta nidio que tan fechos sobre un llibru qu’enxamás foi  editáu como “de testu” nin homologáu como tal nin emplegáu n’escuela dalguna. Ye atristayante qu’ún ministru “perpreparáu” desconoza la materia de la que tien qu’ocupase y seya la caverna mediática la que-y da argumentos. Lo peor ye que nun queda ehí la cosa: güei'l Wert esti torna a meter la patona : va defender la “tauromaquia” y da-y munches perres (pa eso hailes, pa otres coses non) y emplega un argumentu espectacular pa defendelo: en Francia tan tramitando facer de la tortura d’un animal “patrimoniu inmaterial de la humanidá”. La pena ye que, como col llibru, tamién ye una mentira qu’entamó nos medios ultras: enxamás camentaron los franceses facer eso, porque los galos son xente seria que s'esmolez por coses abondo más importantes.

Wert tas nominau: nin tas preparao nin xeneres “confianza”. Si fueres de ZP ya tendríes espaciu propiu nos “Clones” d'Intereconomía. Como yes de Mariano, escuenden el bultu pa que nun se note que nun tienes nin idea. Suerte ser de dereches, ¿non?

Eleiciones, o'l resultáu d'un focicazu.

Yera d’asperar: Cascos convoca eleiciones pal 25 de marzu. La refuga’l presupuestu y la evidencia de que nun ye  afayadizu gobernar a la escontra de la mayoría del Parlamentu, por más qu'ideolóxicamente seya abondo mayoritaria la derecha, fixeron-y aceutar que’l suañu de gobernar Asturies yera, dafechu, una pesadiella.
Vamos ver agora lo que fai la xente neses eleiciones. La derecha lleva dellos meses dando un espectáculu llaceriante, tolos díes a la griesca,  llanzándose insultos, descalificaciones  y dexando nidio que tol interés que tienen ta alrodiu l’asientu presidencial y toles prebendes que produz pa tolos sos collacios.
Tampoco la izquierda dio nenguna muestra de sentíu d’estáu: naide s’alcuerda de nengún proyeutu, iniciativa, propuesta. Ná.
De toles maneres, nun hai posibilidá nenguna de cambiu: los asturianos tan “amnestesiáos” y dixébrense ente los “del PP” los “del PSOE” y los que camienten que’l camín ye votar a I.X. Pal restu nun hai sitiu: o nun hai proyeutu de nenguna clas o nun hai cabezaleru conocíu y de prestixu,, o'l proyeutu ye vendenos al líder de siempres, que por tou méritu tien llevar dende cuantayá ensin algamar ná, y toos refugando la xuntanza como daqué del diañu.
Resumiendo: gane’l que gane, el sillón va garralu unu de los de siempres. A xingas.

El coste de facer lo que-y piden a ún

“La reforma llaboral va costame una fuelga xeneral”. Dalgún micrófonu indiscretu oyó lo que taba falando'l Presidente'l Gobiernu col so collaciu danés, dexándolu como’l novatu que ye. ¿Qué tará pescanciando facer Rajoy que tan seguru ta de que la xente va echase a la cai? ¿Sedrá daqué que vien nel so “programa” eleutoral o, como les xubides d’impuestos, sedrá una ocurrencia-llaceria pa tolos trabayadores? Apuesto polo segundo.
Ye patéticu ver al Presidente’l Gobiernu dando-y la manu a la Merkel, y tovía ye abondo más patéticu cuando ún cai na cuenta de que nun ye Mariano quien garra a Ángela, sinón esta la que “guía” al otru. Dempués de falar abondes vegaes de “nun facer lo que nos digan dende Europa” y d'enllenase la bocona cola “soberanía nacional” qu’ellos diben defender con uñes ya dientes, agora Rajoy quier paecese a Sarkozi nel “contautu” físicu cola teutona.  Esta, de xuru que ta gayolera: ta a una migayina d’algamar el mando en toa Europa, el gran deseo del otru líder alemán por escelencia que quixo y nun pudo: un tal Adolf.
Lo peor ye que les axencies de calificación y los “inversores-especuladores” nun s’enteraron entá de la “confianza” que da l'equipu de Mariano y baxen los “escalones” de dos en dos a la deuda del Estáu. Pero eso nun importa un res al binomiu Rajoy-Merkel: el gallegu va facer la reforma que-y pidi la xermana (y tamién los sos collacios d’ideoloxía de la CEOE) y ta decidíu a facela pola vía del cueste lo que cueste.
Nes nueses manes ta pone-y a esti Gobiernu les coses perdifíciles. Ye necesariu facer alcordanza d'otres movilizaciones, cuantayá, que ficieron camudar d’intenciones a dellos políticos (abondo más espabilaos qu’esti d’agora) per más que llueu se manipularen a esgaya los datos dende los medios favoratibles al Executivu, ñegando la participación o la llexitimidá. Hai qu’armala o tolo fecho dica agora se va perder. Ye lo qu’hai...

Faigan xuegu, señores...

Si delles coses salen como tan asperando Esperanza Aguirre y Ana Botella, el Gobiernu de Rajoy va tener que modificar varies lleis pa “facilitar” el desembarco en Madrid d’un paisanu que quier facer daqué asemeyao a Las Vegas na capital del Estáu. Les más destacaes son les de camudar el Plan Xeneral d’Ordenación Urbana, pa lliberar 6 millones de metros cuadraos, les ordenances fiscales pa da-yos delles “exenciones fiscales” a los promotores,  lliberalos de pagar l’IRPF, l’impuestu de bienes inmuebles, les lleis de contratación de trabayadores, la llei d’estranxería y tamién la llei “antitabacu”.
Y too esto, ¿por qué? Pues al paecer, polo que s'escucha a les dos lidereses enantes nomaes, pa facilitar la creación de más de 200.000 puestos de trabayu na construcción de Casinos, hoteles y campos de golf, asina como nel so mantenimientu ya esplotación.  Bien valen toos esos emplegos saltase dafechu tol ordenamientu xurídicu. Lo importante nun ye qu’esti seya un “Estáu de derechu”, sinón que venga un americanu con perres y monte’l desiertu de Nevada en Madrid, ensin tener qu’axustase a nenguna llei que-y moleste, ofreciendo puestos a esgaya (llueu, cuando cueza l’asuntu ya menguarán) y faciendo abondes perres pa sacales al paraísu fiscal más lloñe.
Igual ye’l momentu de que los grandes distribuidores de droga a nivel mundial s’ofrezan tamién a montar equí un “centru internacional de distribución”, pa lo que ye perimportante que se faigan delles modificaciones nel Códigu Penal y práuticamente toles lleis enantes nomaes. Si prometen namás que seyan 100.000 puestinos, ¿a quien –y esmolez que se camude lo que seya? A naide. ¿Non?
Si’l sofitu de les lidereses madrilanes a esti asuntu fuera d'Urkullu, Más o Rubalcaba, daría llercia ver a los “salvapatrias” que falen tolos díes na TDT diciendo que “morrió l’Estáu de derechu”, “vendemos el país a los foriatos” o'l ya vieyu argumentu de que “el Gobiernu ta agotáu” y da “bandazos”... Ye la suerte de ser peperu: tolo que fagas ye “pol bien d’España”...

¡¡¡¡Llinia!!!!

Fai meses, de la que s'axuntaron por primera vez los conceyales d’Uviéu pa nomar l’alcalde, muncha xente nun entendimos la postura del PSOE uvieín absteniendose pa que saliera l'agora “Delegáu” de Rajoy, Gabino de Lorenzo, escaeciendo, de sópitu, toles llaceries, insultos y desprecios qu’esti señor fixo a los conceyales de la oposición dende que tien, cuantayá, la mayoría absoluta.
Pescanciamos que yera una estratexa p'atapecer, por ambos llaos, delles coses non mui aceutables pa salir a la lluz pública: unos abellugaben a Gabino y otros a Tini, dexaben a Cascos na soledá más alloriante col sillón y namás (o, meyor, na menos) salíen perxudicaos tolos asturianos, en xeneral, y tolos uvieinos en particular.
En Xixón, onde foi defenestrada la llideresa, primero pola direición del so partíu y llueu polos votantes que-y dieron un bon revolcón, frayóse dafechu el “alcuerdu tácitu” y Pilarín votó’l nomamientu de Moriyón, collacia de Cascos, el so enemigu, a la escontra del vientu y la marea col increyible razonamientu de que “el pueblu taba desixendo un cambiu”. En Xixón sí, n’Uviéu non. Sedrá pola humedá.
El casu ye qu'agora dende’l PP tan afogando a Cascos col presupuestu y de xuru que nun lo faen ensin razones oscures. El sustitutu del home de la boina ta al cayer y nun ta nidio que seya'l nomáu “a deu” pol líder popular de toles Asturies. Camienta Arturín, el casquista, presentase tamién y esta vegada ye perposible que la bancada progre-y de los sos sofitos, ente otres razones porque ya nun hai Tini que guardar. Entós la fórmula máxica qu’alcontraron dende’l PP ye evidente: pa que Mesa nun se presente, afogamos a Cascos y que seya esti ‘l que convenza a Arturín pa quedase en casa. Con esti “movimientu” hai, otra vegada, un garapiellu bonu de perxudicaos: los asturianos, como enantes, como siempres.
Ye’l preciu que tenemos que pagar por tar sofitando, dende 1977, a una serie de xentes ensin más interés que la so poltrona ya’l sueldu correspondiente. Xentes ensin oficiu ya ensin beneficiu, que fixeron de la política la forma de fartase, presumir y mercar casines de veranéu en Lleón o pel Mediterráneo.
Delles vegaes, prestaríame ser alemán. O británicu. Asina nun vería dellos caramiellos de los que ya toi abondo cansu de ver. “Nesos llugares tamién hai xostrones” dirá muncha xente. Sí, pero polo menos ente babayada y babayada faen daqué bono pol país. Equí nun faen más que babayaes. Vais velo darréu cola eleición del “socesor”. Siguimos pa bingu...

Xente con morru

Diz, con abondo morru, l'agora President de la Generalitat Valenciana que la culpa del xabaz déficit de la so Comunidá ye “del PSOE”. Fai cuatro llexislatures que tan gobernando los “populares”, toes con mayoría absoluta, pero la culpa, tamién, ye de ZP. Esti home ye’l diañu: tovía nun yera más qu’un diputáu rasu pero ya xingaba a esgaya al President valenciá de turnu.
Ta nidio que facer una carrera de F1 nun foi una decisión de los xestores valencianos, sinón que foi ZP quien-yos pusu una pistola na tiesta pa qu’aceptaren la ufierta del collaciu Ecclestone (sí, el mesmu que dixo fai cinco años que diba haber F1 en Valencia “siempres que gobernare Camps”) Ye más, ZP ye responsable de que, col ablucante déficit qu’hai na rexón qu’obliga a recortes xabaces, esti añu torne de nuevu el “circu” a Valencia.
Tamién foi ZP el “inventor” d’ún equipamientu pernecesariu pa la rexón: el parque “Terra Mítica”. Zaplana primero y llueu Camps dixeron delles vegaes que nun yera necesariu, pero ZP fizo oyíos sordos ya’l parque fíxose y ellí ta. 
El “aeropuertu peatonal” de Castellón nun foi culpa de ZP, pero de xuru que'l sociata s’apaeció en suaños a Fabra pa ordena-y que lo fixera y que lo rematara cola so estatua. Ye verdá que'lsuertudu presidente de la Diputación envede poner la estatua de ZP puso la de so, pero ye tamién por culpa ZP, que nun foi abondo nidio nes esplicaciones.
El casu ye que la Generalitat ta en ruina pero los que tan xingaos son la xente que trabaya ellí (funcionarios y llaborales abondo mangantes, como ye persabío) y la xente de la cai, que ye la máxima responsable como votante. Los que sufrieron el “glamour” de los grandes eventos pagaos coles perres de toos nun son los culpables: ye ZP.

El paru y una tertulia

Dicía esti día na tele una periodista de fama internacional (trabaya n’Intereconomía y ente los sos “ésitos” ta asegurar que de siguío de que ganara Rajoy les eleiciones baxaba la “prima riesgu” 200 puntos, col resultáu de toos conocíu) y d’apellíu Tomás, que, por enriba de tolos derechos llaborales que se fueron algamando dende cuantayá y que costaron a muncha xente dolor, llárimes y abondes hosties, ta'l derechu a tener xera.
Verdá ye qu'ensin trabayu nun hai seguridá llaboral que valga, pero paez que naide cai en que, pol fechu del xabaz paru que sufrimos, nun hai que tornar, de nuevu, a la esclavitud. Nun paez de recibu que seya la xente probe la que pon los dos papos pa recibir les bofetaes mientres los empresarios y la xente que nun cotiza al IRPF ca vegada ganen más y paguen menos. Tan estos díes los sindicatos y los empresarios falando d’una “reforma llaboral” que ya dixo'l Presidente que diba facer darréu, con alcuerdu o ensin él. Los cabezaleros de la CEOE nun tienen un res d'interés en pautar, porque paez-yos, como asina va ser, que’l Gobiernu va arrimar pa ellos.  Como ya dixi n’otru post d’esti mesmu blog, toi seguru qu'una reforma llaboral nun va dar xera, sinón quita-y derechos a los trabayadores que los tienen. Si ún de les metes de toles sociedaes modernes ye meyorar les condiciones de la xente con más llaceries pa igualala coles de los ciudadanos más acomodaos, nesti estáu tan dando-y la vuelta y el Gobiernu, col sofitu absolutu de los medios de la derecha, puxa por igualar los derechos de quien tien daqué seguru col guah.e que tien un contratu basoria a tiempu parcial y col salariu mínimu agora conxeláu.
Esi ye, tamién, otru fin qu'asoleyen dende la derecha y que, como bona “voz del so amu” defendió la tertuliana enantes nomada: xeneralizar lo que dan en nomar “minijobs”, o seya, lo que toos nomamos fai abondo tiempu “xera a tiempu parcial”, cola escusa de que “n’Alemania hai siete millones de trabayadores asina”. Namás faen alcordanza d’Alemania pa lo malo, enxamás, por exemplu, pa igualanos los sueldos colos teutones. Pero ye que, amás, naide s’entruga quien ya en qué condiciones trabaya ellí a tiempu parcial. Si ún de los miembros d’una parexa tien un emplegu “a tiempu completu”, pode convenir al otru un “minijob”, o un mozu que ta colos pás, pero un pá o una ma de familia, nun ye afayadizu que trabaye asina, pa entamar porque nun.y alcancen les perres pa pagar l’alquiler o la hipoteca. El “minijob” tien que ser daqué voluntariu, non el caberu fin de tolos paraos.
Faló tamién un collaciu de l'antedicha, Conseyeru nesa autonomía tan dinámica y perpoco empufada que ye Murcia, faciendo un paralelismu ente la economía ya’l deporte, y dixo que pa “poner un cuerpu pa competir, hai qu’entamar por adelgazalu pa llueu ponelu en forma”. En asturianu: xingas toos pasando fame pa llueu ver si esi “cuerpu” acaba por ser un atleta d’élite. Pero hai dos problemes: non tolos “cuerpos” valen pa llegar a la “élite” y, sobre too, pa “educar” a esi atleta fai falta un “entrenador” que valga. La primer torga ta perdifícil, pero la segunda ye, a día de güei, una quimera. Y, pa enriba, igual l'atleta se nos muerre de fame de tanto “adelgazalu”...