El nuevu Xénesis

…Y camentó‘l Señor que Gabino taba cansu de l'alcaldía y nomólu “Delegáu del Gobiernu”, y vió’l Señor que taba bien fechu y escureció y riscó, octavu día…
La verdá ye que nun sabemos si lo que-y petaba al Señor yera separtar a Gabino d'un puestu nel que taba, dende cuantayá, siendo un pilancu pa la rexeneración del so partíu n’Asturies, ca vegada más atapecíu y amurniáu. Ye tamién Gabino l'exemplu máximu del despilfarru y del gastu ensin control de clas nengún, dexando nes manes del so socesor un pufu desaxeráu que naide sabe como nin cuando va pagase.
Otru asuntu ye l’entendimientu, obligáu ente partíos asemeyaos política ya ideolóxicamente, col Foro de Cascos, dempués de qu'esti diera un revolcón pergrande al PP nes eleiciones, siendo Gabino ún de los culpables, si non el más, de la dixebra de la derecha nel nuesu país. Ye sonroxante facer alcordanza  del agora Delegáu en febreru de 2010 allabando a Cascos con aquelles pallabres tan concluyentes: “ye un galácticu de la política”, pa de sópitu camudar y dicir ensin rubor que yera “un xubiláu” y “un traidor al partíu”. Les eleiciones, como ya pasara nel 2008 cuando'l propiu Gabino foi cabezaleru na candidatura’l PP, punxeron a caún en so sitiu: Cascos ganó y Gabino perdió la mayoría absoluta cola que facía y desfacía lo que-y petaba nel so conceyu.
La verdá ye que’l puestu de Delegáu del Gobiernu ta abondo desprestixáu nesti país. Dende qu'Aznar nomó a l'agora diputada Cherines Fernández, una muyer que namás tenía l’enfotu de ser alcaldesa de Xixón y perdió delles vegaes con Areces y con Felgueroso, y qu'algamó esi puestu como premiu al servilismu a Cascos (entós el mandamás del PP)  pa llueu vese envuelta nel xaréu de la dinamita’l 11-M (como máxima xefa de la Policía), fasta que ZP nomó a Trevín, expresidente d’Asturies, socediendo al inefable Rodríguez-Vigil (dimitíu a resultes del escándalu del “petromochu”) y gran derrotáu nes eleiciones qu'encumaron a Marqués a la Presidencia, paez que la poltrona de Delegáu ye pa dinosaurios. Y el nomamientu de Gabino nun fai sinón confirmalo.
Nel actu de toma de posesión, hubo cares llargues y saludos fríos, pero ta nidio qu’al final, tolo qu’importa ye’l cargu, Cascos tien el de so, Gabino tien el de so, toos tienen el de so. Y a los asturianos que nos xinguen.