Güei, al mediudía, taba escuchando a la Vice, Sorayina, falando del “déficit de la Seguridá Social” pa esti añu: el 0,06%, o lo que ye lo mesmo, 668 millones d’euros de ná. De la que taba oyendo, paecióme que la rellación entre 668 y 0,06% nun yera mui normal. Llueu, camentando y falando del tema con otra xente, cayí na cuenta de que si eses cantidaes son reales, el 100% de la recaudación de la S.S. yera la monstruosidá de 1.113.333.000.000 d’euros. Ye necesariu fixase bien: más d’ún billón. Entós diome por “repartir” eses perres ente los “beneficiarios”: (9.278.000 xubilaos en setiembre de 2011): casi 200.000 euros pa caún. ¿Cobren 200.000 euros los pensionistes? De xuru que non. ¿Cuántu cobren? Al paecer, según dalguna páxina, la pensión media ye de 800 euros al mes, asina que'l total de perres pa pensiones sedrá de 800 x 14 x 9.278.000 = 103.913.600.000 euros. O seya, ¡¡sobra un billón d’euros!! Esto va ser qu'hai delles coses más que pagar: ILT, maternidá, etc. Vamos echá-y un güeyu al presupuestu del añu 2011: 124.400.000.000 d’euros. ¿Y si sumamos la sanidá pública? Según diz dalguna web, el presupuestu total ye de 60.000 millones.
Total, qu'equí falla daqué: o'l nuevu Gobiernu “corrió” la coma a sabiendes y pa desaxerar les coses y llueu sotripanos el monederu a dolor o la Sorayina fala ensin sentíu dalgún. O ambes coses a la mesma vegada.
Ye abondo ablucante tamién l’anunciu d’ún “ambiciosu plan” a la escontra’l fraude fiscal, col propósitu de recaudar ¡¡2.000 millones d’euros menos que l'añu acabante!! Eso si ye “ambición” y non otres hestories. Agora sí tenemos un Gobiernu que nun “improvisa” , que sabe dafechu ú tan les prioridaes y como abordales…
Y, a too esto, el Presidente ensin apaecer, nin pescanciar facelo dica febreru, dempués de dir a rindir cuentes al duetu “Merkozy”. Ellos los primeros, por más que llevaba dende cuantayá falando de “soberanía nacional” y de que “les midíes imponíennoslles otros”.
Preparémonos pa lo peor…
No hay comentarios:
Publicar un comentario