Diz Esperanza Aguirre, falando p'ABC, que’l socesor de Rajoy “ta faciendo agora’l bachilleratu”. Paezme que va ser pa tar una migayina más preparáu que’l sucedíu, porque ye en verdá incomprensible qu’ún llicenciáu en Derechu, rexistrador de la Propiedá, col númberu ún, muestre tan poques lluces. Toi por apostar lo que seya porque, tando les coses como tan y como van ponese coles nueves “midíes” desta xente, nun fina la llexislatura y tien que ponese un “tecnócrata” como socedió n’Italia y Grecia. Al tiempu…
La “lideresa” nun asperaba ser ministra, al paecer, porque “ya lo foi” pero hai delles coses que nun s'escaecen como que Gallardón “fai cuantayá que quier ser ministru”. Sí escaez, en cambiu, la griesca que montó nel 2008 a la escontra del so, agora, “amáu líder”, diciendo que yera porque camentaba, de la que salió al corredor de Génova, que diba a marchase pa la so casa, pero llueu al velu cola intención de siguir sofitólu darréu porque “nun toi dispuesta a tirar del caballu al líder del mio partíu”, como si la xente hubiere escaecío dafechu la “encerrona” que fixo Rajoy en Valencia cola andecha de Camps “el de los traxes”.
Como ye davezu, el nuevu Gobiernu paece-y “formáu y con esperiencia”. De xuru que tien qu'haber opiniones de toles clases, tovía más si de siguío afirmes que “va sacanos de la crisis”. Eso ye optimismu y tolo demás cuentos.
Pa finar, regalu envenenáu pa Gallardón y Rajoy: “Soi partidaria de baxar los impuestos y él [Gallardón] nun siempre los baxó”. De la cabera xubida de Rajoy nun dixo ná pero debe tar a la escontra de xuru, anque’l periodista, como nun podía ser d’otra manera trabayando pal mediu nel que ta, tampoco-y entrugó, y nun vayamos a sabelo enxamás. Una llástima, ¿non?
No hay comentarios:
Publicar un comentario