La "prima"...

Dicen los medios dixitales que la “prima riesgu” del Estáu ta xubiendo y algama ya los 385 puntos básicos.  Ye una permala noticia pal Gobiernu, que cai agora na cuenta de que’l fechu de que ganara’l PP les eleiciones nun ye abondo pa contener la voracidá de los mercaos.
Ye xustu facer alcordanza agora de les pallabres d'una señora, de nome Carmen Tomás, nesi mediu tan “independiente” que ye Intereconomía, dando-yos a los espectadores razones, si ye que-yos facíen falta, pa votar al PP: “al otru día de ganar Mariano, baxa la prima riesgu 200 puntos”.  Y non, a los especuladores foriatos nun-yos impresiona Mariano. Ye más, tampoco lo fai'l tecnócrata qu'ellos mesmos pusieron n’Italia: la prima d’esi país ta desbocada tamién.
Sorprendi, de toles menes, que los mesmos que falaben de que tábemos “nel borde de la intervención” fai poco más d’ún mes, tean agora callaos como muertos. Ye verdá que nun ye lo mesmo que tea ún u otru, porque l’otru “improvisaba” y esti tien pernidio lo que tien que facer: facilita la compra de vivienda por un llau y xube l’IBI pol otru (pa compensar), xube’l 1% delles pensiones y xube tamién l’IRPF  (como compensación), torga’l pagu n’efectivo (dempués de criticar delles vegaes al primero que faló d’ello na cabera campaña eleutoral) y anuncia que va a facer un siguimientu “de los pagos con tarxeta”… Equí nun hai contradiciones, equí faise asina A CONCIENCIA. Lo peor ye que los “inversores foriatos” nun tan al cabu la cai de les maneres de tomar midíes de Rajoy. Ehí tamos perdíos: la xente qu'entiende a Mariano nun ye la que tien perres “a lo grande” y la que tien les perres nun entiende al Presidente. Lo peor ye que si, como dixi enantes, tampoco un “tecnócrata” ye la solución,  rezá-y lo que sepáis, collacios…