L'otru Aguirre

A Ana Pastor, presentadora de “Los Desayunos” de TVE, queden-y cuatro telediarios, enxamás meyor dicho. Esta rapaza ye, dafechu, la periodista más “incisiva” colos políticos que sienta na so mesa y va costá-y el puestu. Na primer entrevista dempués de les vacaciones de navidá, l’invitáu foi un tal Ramón Aguirre, voceru axuntu del PP nel Congresu, que tornó, como pudo, les acometíes d'Ana y los collacios periodistes (una d’ellos del diariu “El Mundo”) alrodiu de la xubida d’impuestos.
Echáben-y en cara a Aguirre que, per más que los agora ministros llevaben dende cuantayá falando del “déficit”, Rajoy nun tuvo torga nenguna en prometer nel so discursu d’investidura que “nun diba a tocar la tributación”. El probe Ramón, lluchó a brazu partíu pa borrar la imaxe d'incumplidor del so cabezaleru, abellugándose, ¿como non?, na “herencia” que da títulu a esti modestu blog y esnidiando que l'agora presidente dixo “si nun había sorpreses” y al paecer habíales: el déficit del Estáu yera un 0,3% mayor del esperáu, demientres que’l de les Comunidaes, 14 de 17 gobernaes pol propiu PP o sos “socios” taba disparáu (ya’l probe Mariano nun lo sabía) …
Entrugáu darréu por esi déficit, entamó a glosar les maraviyes que ta faciendo la Cospedal en Castiella-La Mancha, esquivando dafechu a Valencia, que ye la más endeudada de toes. Dempués d'abondos “capotazos”, finó por falar de “la iniciativa d’aforru” que presentó Fabra, escaeciendo que púnxose a facela de siguío de la de Rajoy, cuando’l desparrame ye dende cuantayá.
Tando ya acabante la entrevista, esti paisanu nun tuvo inconveniente nengún en cubrise de gloria: de la qu'Ana y los sos collacios falaron delles vegaes de que la xubida del IRPF nun afeutaba a los más ricos sinón a los probes y “clases medies” y que naide s’atrevía a mete-yos caña, dixo ensin rubor nengún: “Si usté lo que ta entrugándome ye l'impuestu pa ricos, yo personalmente considero que, nesti momentu, hai  qu'atopar un impuestu que tenga una capacidá de recaudación darréu y rápida y esti impuestu ye l'IRPF” (min 55-56 del videu). A los ricos cuesta a esgaya saca-yos les perres, al paecer. Lo fácil ye sacá-yosles a los probes. Igual ye por eso que son ricos: porque nun hai político nengún colos coyones abondos pa garra-yos les perres.