Falen dende'l gremiu d'academies de preparación de oposiciones de "llaceria total" pola midía, espublizada fai unos díes, de nun convocar pruebes pa cubrir places nes Alministraciones Públiques. Abondos profesores vense darréu na cola l'INEM dempués de munchos años de xera estable o ven recortáos los ingresos "estra" que completaben los sueldos de caún. Delles fontes, cifren los afectáos en 5000 persones, entre profesores y xente de sofitu. Nun hai dulda que ye una traxedia, una más de les munches que la crisis ta dexando en delles estayes sociales del Estáu.
Ye evidente que esti problema yera perfeutamente evitable si'l gobiernu nun conxelara toa la oferta d'emplegu públicu, decisión abondo populista (la mayoría la xente ta dafechu d'alcuerdu cola idega, dau que tol mundiu camenta que los "funcionarios" nun trabayen un res) que nun va sinon a facer que espoxigue l'emplegu temporal ente los trabayadores públicos al cubrise dafechu con interinos places que nun pueden dexase ensin xente. Interinos que, si se xeneraliza la idega del sustitutu de Camps de recorta-yos xornada llaboral y sueldo, van trabayar por un sueldu abondo curtiu pa vivir ya ensin tener otra xera pa la que dir, dau como tan les coses. De xuru que darreu vamos ver nes oficines, nos hospitales, nes residencies y fasta nos colexos xente trabayando por menos de 600 euros al mes y pa enriba col despidu a la vuelta de la esquina.
No hay comentarios:
Publicar un comentario